နမ္မတူမြို့နယ်၌ အသက် ၁၅ နှစ်အရွယ် မိန်းကလေးကို သံချောင်းဖြင့် ရိုက်၍ မီးရှို့သတ်သူကို ဖမ်းမိ

နမ္မတူမြို့နယ်၊ နမ့်တောင်ကုန်းကျေးရွာအုပ်စု၊ ပန်သပြေကျေးရွာ မြောက်ဘက် တစ်မိုင်ခန့်အကွာရှိ ဓါတ်ငွေ့ပိုက်လိုင်း မှတ်တိုင်အနီး လူသွားလမ်းဘေး၌ အသက် ၁၅ နှစ်အရွယ် မိန်းကလေးကို သံချောင်းဖြင့် ရိုက်၍ မီးရှို့သတ်သည့် အမျိုးသားကို အောက်တိုဘာလ ၅ ရက်၊ နံနက်ပိုင်းတွင် ရဲတပ်ဖွဲ့က ဖမ်းမိခဲ့ကြောင်း သိရသည်။
.
အသတ်ခံရသူ မိန်းကလေးငယ်မှာ နမ္မတူမြို့နယ်၊ ကြူဆော့ကျေးရွာအုပ်စု၊ ပန်ကွဲကျေးရွာနေသူ ဖြစ်ပြီး ၎င်းအား သံချောင်းဖြင့် ရိုက်၍ မီးရှိုးသတ်သူ အမျိုးသားမှာ နားဆိုင်းကျေးရွာနေ အသက် ၂၁ နှစ်အရွယ် စိုးမင်းပိုင် ဖြစ်ကြောင်း သိရသည်။
.
သေဆုံးသူသည် စက်တင်ဘာလ ၃၀ ရက်၊ ညပိုင်းတွင် စိုးမင်းပိုင် လာခေါ်၍ အပြင်ခဏ သွားဦးမည်ဟု မိခင်ဖြစ်သူအား ပြောကာ ထွက်သွားပြီးနောက် ပြန် မလာဘဲ ပျောက်ဆုံးနေကြောင်း၊ သေဆုံးသူ၏ မိခင်ဖြစ်သူသည် အောက်တိုဘာလ ၃ ရက်တွင် မီးရှိုးအသတ် ခံရသော မိန်းကလေး ရုပ်အလောင်း တွေ့သည့် သတင်းအရ ကျေးရွာအုပ်စုအုပ်ချုပ်ရေးမှူးထံ သွားရောက်ကာ မှတ်တမ်းဓါတ်ပုံများအား ကြည့်ရှုရာ သမီးဖြစ်သူ၏ ခန္ဓာကိုယ် အချိုးအစား၊ သမီးဖြစ်သူ၏ အဖြူရောင် မိန်းမစီး ဖိနပ်တို့အား တွေ့ရှိခဲ့သဖြင့် ရုပ်အလောင်းမှာ ၎င်း၏ သမီးဖြစ်သည်ဟု ရဲတပ်ဖွဲ့ထံ အတည်ပြုပေးခဲ့ကြောင်း သိရသည်။


.
ယင်းနောက် နမ္မတူမြို့မရဲစခန်းမှ စခန်းမှူး ဒုရဲမှူး မြင့်ဇော်နိုင် ဦးဆောင်သော ရဲတပ်ဖွဲ့ဝင်များသည် အောက်တိုဘာလ ၅ ရက်၊ နံနက်ပိုင်းတွင် နားဆိုင်းကျေးရွာသို့ သွားရောက်၍ စိုးမင်းပိုင်အား ရဲစခန်းသို့ ခေါ်ဆောင်ကာ စစ်ဆေးရာ စိုးမင်းနိုင်နှင့် သေဆုံးသူသည် သမီးရည်းစားများ ဖြစ်ကြောင်း၊ စက်တင်ဘာလ ၃၀ ရက်၊ ည ၇ နာရီခန့်တွင် သေဆုံးသူအား သွားရောက် ခေါ်ဆောင်ကာ ပန်သပြေကျေးရွာ အနီးတွင် စကား ပြောကြစဉ် သေဆုံးသူမှ ခိုးပြေးရန် ပြောဆိုခဲ့ကြောင်း၊ စိုးမင်းပိုင်မှ ဝါတွင်းကာလ ဖြစ်၍ ယူရန် မဖြစ်သေးကြောင်း ပြောရာ သေဆုံးသူမှ ၎င်း၏ အစ်ကိုနှင့် တိုင်ပြောမည်ဟု ပြောဆိုသဖြင့် ကြောက်၍ ဆိုင်ကယ်တွင် အသင့်ရှိနေသော ဟင်ဂလန်သံချောင်းဖြင့် ဦးခေါင်းအား ၂ ချက် ရိုက်နှက်၍ လဲကျသွားစဉ် တောစပ်အနီး တွေ့ရှိသော စောင်အား ယူ၍ ဦးခေါင်းအား ဖုံးကာ သံချောင်းဖြင့် ၃ ချက် ထပ်မံ ရိုက်၍ အသင့်ပါလာသော မီးခြစ်ဖြင့် စောင်အား မီးရှို့ခဲ့ခြင်း ဖြစ်သည်ဟု ထွက်ဆိုခဲ့ကြောင်း ရဲမှတ်တမ်းများအရ သိရသည်။
.
အဆိုပါ ထွက်ဆိုချက်အရ အခင်း ဖြစ်ပွားရာ နေရာရှိ သက်သေခံပစ္စည်းများအား သိမ်းဆည်းကာ စိုးမင်းပိုင်အား နမ္မတူမြို့မရဲစခန်းမှ ဖမ်းဆီး၍ ဥပဒေအရ အရေးယူ ဆောင်ရွက်ထားကြောင်း သိရသည်။

Add a Comment

Your email address will not be published. Required fields are marked *