တာချီလိတ်၏ ပထမဆုံး အတည်ပြုလူနာ Case 96 တွင် Covid-19 ပိုး ပြန်တွေ့

ရှမ်းပြည်နယ်(အရှေ့ပိုင်း) တာချီလိတ်မြို့မှ ပထမဆုံး အတည်ပြုလူနာ Case 96 သည် ဆေးရုံဆင်းပြီး ရက်ပေါင်း (၄၀)အကြာ ၂၀၂၀ ခုနှစ်၊ ဇွန်လ (၃၀)ရက်နေ့တွင် COVID 19 ပိုးပြန်တွေ့ရသဖြင့် အနီးကပ်ထိတွေ့သူများကို အသွားအလာကန့်သတ်ထားပြီး အတည်ပြုလူနာအား ဆေးရုံခေါ်ဆောင်ရန် စီစဉ်နေပြီဖြစ်ကြောင်း သိရသည်။

“Case 96 က ရန်ကုန်ပြန်တော့မှာဆိုတော့ သူက ပြန်စစ်လိုက်တော့ အဲဒီမှာ Positive ဖြစ်တယ်လို့ အဖြေရတယ်။ အဲဒီတော့ သူဆေးရုံဆင်းတာကနေ အခုချိန်ထိ အနီးကပ်ထိတွေ့သူတွေ စာရင်းကောက်ယူပြီး facility quarantine နဲ့ hospital quarantine ထားမယ်” ဟု ရှမ်းပြည်နယ်(အရှေ့ပိုင်း) ပြည်သူ့ကျန်းမာရေးဦးစီးဌာနမှ လက်ထောက်ညွှန်ကြားရေးမှူး ဒေါက်တာဘစိုးသက်က ပြောသည်။

အဆိုပါ Case 96 မှာ ဧပြီလ (၁၈) ရက်နေ့၌ အတည်ပြုလူနာအဖြစ် ဓာတ်ခွဲအတည်ပြုခဲ့ပြီးနောက် ကျိုင်းတုံပြည်သူ့ဆေးရုံ၌ ကုသမှုခံယူခဲ့ကာ မေလ (၂၀) ရက်နေ့၌ ဆေးရုံဆင်းခွင့်ရခဲ့ခြင်းဖြစ်သည်။

ရှမ်းပြည်နယ်အရှေ့ပိုင်းတွင် မိုင်းဖြတ်မြို့မှ အမျိုးသားတစ်ဦးမှာ ၂၀၂၀ ခုနှစ်၊ ဧပြီလ (၁၅)ရက်နေ့တွင် ဓာတ်ခွဲအဖြေရလာခဲ့သဖြင့် ရှမ်းပြည်နယ်အရှေ့ပိုင်း၏ ပထမဆုံး COVID 19 အတည်ပြုလူနာဖြစ်လာခဲ့ပြီး ဒုတိယမြောက်လူနာအဖြစ် တာချီလိတ်မှ (Case 96) ဆရာဝန် အမျိုးသားကို ဧပြီလ (၁၈)ရက်နေ့တွင်လည်းကောင်း၊ တတိယမြောက်လူနာအဖြစ် တာချီလိတ်မှ သူနာပြုဆရာမကို (Case 112) ကို ဧပြီလ (၂၀) ရက်နေ့တွင်လည်းကောင်း အသီးသီးဓာတ်ခွဲတွေ့ခဲ့ရခြင်းဖြစ်သည်။

အဆိုပါ အတည်ပြုလူနာ (၃)ဦးလုံးကို ကျိုင်းတုံပြည်သူ့ဆေးရုံ၌ ကုသပေးခဲ့ပြီးနောက် အတည်ပြုလူနာ (၃)ဦးအနက် Case 96 မှာ မေလ (၂၀)ရက်နေ့တွင်လည်းကောင်း၊ Case 112 မှာ ဇွန်လ (၅)ရက်နေ့တွင်လည်းကောင်း ဆေးရုံဆင်းခွင့်ရထားပြီး Case 64 မှာ ဇွန်လ (၁၄)ရက်နေ့တွင် ဆေးရုံဆင်းခွင့်ရသွားခြင်းဖြစ်သည်။

သတင်း – ချယ်ရီထိုက်

Add a Comment

Your email address will not be published.