ရန်ကုန်မှ မန္တလေးသို့ လာသူများ မဖြစ်မနေ Quarantine ဝင်ရမည်

ရန်ကုန်တိုင်းမှ မန္တလေးတိုင်းဒေသကြီးအတွင်းသို့ လာရောက်သူ မှန်သမျှ Quarantine ၂၁ ရက် မဖြစ်မနေ ဝင်ရမည် ဖြစ် ကြောင်း တိုင်းခေတ္တ ဝန်ကြီးချုပ် ဦးဇာနည်အောင်က ပြောသည်။

“ရန်ကုန်တိုင်း တခုကလွဲရင် တခြားတိုင်း၊ ပြည်နယ်တွေ ကျန်တာတော့ မရှိသေးပါဘူး။ ရန်ကုန်ကတော့ ဂရုစိုက်ရမယ့် ဒေသဖြစ်သွားပြီ ဆိုတော့ တိုင်းအတွင်း လာရင်တော့ ရောဂါ မပြန့်ပွားရေးအတွက် ထိန်းချုပ်ရမှာပေါ့” ဟု ဦးဇာနည် အောင် က ဆိုသည်။

ရန်ကုန်တိုင်းမှ လာရောက်သူ ဖြစ်ပါက မန္တလေးမြို့တွင် ပြင်ဆင်ထားသော Facility Quarantine ၂၁ ရက် ဝင်ရမည် ဖြစ်ပြီး အဆိုပါ ကိစ္စနှင့်ပတ်သက်၍ မန္တလေးတိုင်း အစိုးရက ဒေသန္တရဆိုင်ရာ အမိန့်အဖြစ် မထုတ်ပြန်တော့ဘဲ ဌာန တွင်း ညွှန်ကြားချက်ဖြင့်သာ သက်ဆိုင်ရာ တာဝန်ရှိ ဌာနများအား ညွန်ကြားထားပြီး ဖြစ်သလို ယခု သီတင်းပတ်မှ စတင် မည်ဟု သိရသည်။

ဦးဇာနည်အောင်က “ရန်ကုန်က လာတဲ့သူ ဟုတ်မဟုတ် ဆိုတာ မြို့ဝင် ထွက်ပေါက် ၁၂ နေရာမှာ စောင့်ကြည့် စစ် ဆေးမှုတွေ လုပ်နေတာဆိုတော့ ရန်ကုန်က လာတာ ဟုတ်တယ်၊ မဟုတ် သိနိုင်ပါတယ်။ သင်္ကြန်တွင်းတုန်းက တောင် မိသားစုလိုက်တွေ ရန်ကုန်က လာကြတာတွေ ရှိပေမယ့် ဒီအခြေအနေတွေကို ရှင်းပြပြီး ပြန်လွှတ်လိုက်တယ်” ဟု ပြောသည်။

သင်္ကြန်ကာလက ရန်ကုန်တိုင်းအတွင်း ကိုရိုနာဗိုင်းရပ်စ် ကူးစက်မှု မြင့်မားလာသဖြင့် မန္တလေးသို့ ရန်ကုန်မှ လာ ရောက်သည့် ယာဉ်များ၊ ဧည့်သည်များ လက်မခံရန်၊ ရန်ကုန်မှ ဝင်ရောက်လာသူများ မဖြစ်မနေ ကျန်းမာရေး ဆိုင်ရာ စောင့်ကြည့်မှုများ ပြုလုပ်ရန် မန္တလေးမြို့ခံအများစုက Facebook စာမျက်နှာကတဆင့် တိုင်းအစိုးရထံ တောင်းဆိုမှု များ ပြုလုပ်ခဲ့ကြသည်။

ထိုင်း၊ တရုတ် နယ်စပ်တို့မှ ပြန်လာသူများ ဖြစ်ပါက အဆိုပါ နယ်စပ်ရှိ Quarantine စင်တာများတွင် ၂၁ ရက် ကျန်းမာ ရေးဆိုင်ရာ စောင့်ကြပ်ကြည့်ရှုခြင်း ခံယူပြီးနောက် ရက်ပြည့်ပါက သက်ဆိုင်ရာ Quarantine စင်တာများက ၎င်းတို့ အား ကျန်းမာရေး စောင့်ကြည့်မှု ခံယူပြီးဖြစ်ကြောင်း အသိအမှတ်ပြု လက်မှတ် ထုတ်ပေးမည်ဖြစ်ကာ ယင်းလက်မှတ် နှင့်အတူ မန္တလေးတိုင်းသို့ ပြန်လာသူဖြစ်ပါက အိမ်တွင် ၇ ရက် အသွားအလာ ကန့်သတ်မှု ခံယူရမည် ဖြစ်သည်ဟု သိရသည်။

အခြား ပြည်ပနိုင်ငံများမှ မန္တလေးတိုင်းသို့ ဝင်လာသူဖြစ်ပါက မဖြစ်မနေ Facility Quarantine ၂၁ ရက် ဝင်ရမည် ဖြစ် ကြောင်း တိုင်းအစိုးရက ယခင်လမှ စတင် သတ်မှတ်ထားပြီး ဖြစ်သည်။

မန္တလေးတိုင်း စကျင်ကျေးရွာ အုပ်ချုပ်ရေးမှူး ဦးစိုးအောင်က “ပြည်ပကနေ ရွာပြန်လာတဲ့သူတွေကို ဒီလို စောင့်ကြည့် ခံဖို့ ပြောရတဲ့အခါ တချို့ကျလည်း သဘောပေါက် လက်ခံတဲ့ သူ ရှိသလို၊ တချို့ကျလည်း လက်မခံကြဘူး။ ဒါကလဲ ရောဂါသည် အနေနဲ့ သူတို့ကိုသတ်မှတ်တာမျိုး မဟုတ်ဘဲ ကိုယ့်ရပ်ရွာ၊ ကိုယ့်ဒေသအတွက် မလိုလားအပ်တဲ့ ရောဂါ တွေ မဖြစ်အောင် ယာယီစောင့်ကြည့်ရတာပါပဲ” ဟု ဧရာဝတီကို ပြောသည်။

မန္တလေးတိုင်း အတွင်း Facility Quarantine ဝင်ရောက်နေသူ ဦးရေ ၄ ထောင်နီးပါး ရှိပြီး ၂၁ ရက်ပြည့်ပြီးသွားသူ ဦး ရေ ၈၀၀ ကျော် ရှိကြောင်း မန္တလေးတိုင်း အစိုးရက သတင်း ထုတ်ပြန်ထားသည်။

လက်ရှိ မြန်မာနိုင်ငံတွင် ကိုရိုနာဗိုင်းရပ်စ် ကူးစက်မှု အခြေအနေကြောင့် မန္တလေးတိုင်းအတွင်း ဝင်ထွက် သွားလာမှု ကန့်သတ်ခြင်းအား ဧပြီ ၃၀ ရက်အထိ ကာလ ထပ်တိုးသတ်မှတ်ထားသလို မန္တလေးတိုင်း အခြေစိုက် ခရီးသည်တင် ယာဉ်လိုင်းပြေးဆွဲမှုများ၊ စည်ပင် လက်အောက်ရှိ ဈေးများ၊ ဟိုတယ်၊ တည်းခိုခန်းများ၊ ဆောက်လုပ် ရေးလုပ်ငန်းများ၊ အဝတ်အထည်ဆိုင်များသည် ယခုလကုန်အထိ ယာယီ ပိတ်သိမ်းရမည်ဟု ဒေသန္တရဆိုင်ရာ အမိန့် ထုတ်ပြန်ထား သည်။

ထို့အတူ မန္တလေးတိုင်းအတွင်းသို့ ကုန်စည်စီးဆင်းမှုအတွက် ဝင်၊ထွက်နေသော ကုန်တင်ယာဉ်နှင့် ၇ ဦးထက် မပို သော သာမန် အိမ်စီးကားများမှ အပ မည်သည့်ယာဉ်မှ တိုင်းအတွင်း ဝင်ထွက်သွားလာခွင့်အား ယာယီကန့်သတ်ထား သည်။

ယင်းပြင် မန္တလေးတိုင်း အစိုးရသည် ဧပြီ ၁၇ ရက်မှ စတင်၍ ည ၁၀ နာရီမှ နံနက် ၄ နာရီအတွင်း အပြင် ထွက်ခြင်း မပြုရန်၊ ကုန်စည် စီးဆင်းမှု အတွက်ဆိုပါက သက်ဆိုင်ရာဌာန၏ ခွင့်ပြုချက်ဖြင့် ဆောင်ရွက်ရန်၊ နေ့ခင်းတွင်လည်း အိမ်ထောင်စု တစုလျှင် လူတဦးသာ အပြင်ထွက်ရန်၊ အပြင်ထွက်ပါက Mask များမဖြစ်မနေ တပ်ဆင်ကြရန်အတွက် ဧပြီ ၁၆ ရက်က အမိန့် ထုတ်ပြန်ထားသည်။

သတင်း – မြတ်ပြည့်ဖြိုး(ဧရာဝတီ)

Add a Comment

Your email address will not be published. Required fields are marked *