Quarantine ရက်ပြည့်ပြီးပြန်လာသည့် သားအဖနှစ်ဦးတွင် Covid-19 ရောဂါ သံသယလက္ခဏာပေါ်လာ၍ မလှိုင်ပြည်သူ့ဆေးရုံတင်ထားရ

မန္တလေးကနေ Quarantine ရက်ပြည့်ပြီး မလှိုင်မြို့နယ်၊ ကံတွင်းကျေးရွာကိုပြန်လာတဲ့ သားအဖနှစ်ဦးမှာ Covid-19 ရောဂါ သံသယ လက္ခဏာတွေပေါ်လာခဲ့တာကြောင့် ဧပြီ(၁၃)ရက်က မလှိုင်ပြည်သူ့ဆေးရုံကို အရေးပေါ်တင်ခဲ့ ကာ စောင့်ကြပ်စစ်ဆေးမှုတွေပြုလုပ်ထားတယ်လို့ ဆရာဝန်ကြီး ဒေါက်တာ နေမင်းမျိုးထွန်းကပြောပါတယ်။

အဲဒီအသက်(၃၄)နှစ်အရွယ် လူနာအမျိုးသားဟာ မန္တလေးမြို့က အင်းဝ small river စားသောက်ဆိုင်မှာ အလုပ် လုပ်သူဖြစ်ပြီး မတ်(၁၅)ရက်က အတည်ပြုလူနာအမှတ်(၈)နဲ့ အဲဒီဆိုင်မှာပဲ ဆုံတွေ့ခဲ့ဖူးသူဖြစ်တယ်လို့ မလှိုင် အထွေထွေအုပ်ချုပ်ရေးဦးစီးဌာန မြို့နယ်အုပ်ချုပ်ရေးမှူး ဦးကျော်စိုး ကပြောပါတယ်။

အဲဒါကြောင့် မန္တလေးမှာ Home Quarantine အဖြစ် မတ်(၁၅)ရက်ကနေ (၂၈)ရက်အထိနေထိုင်ခဲ့ပြီးနောက် မတ်(၃၀)ရက်မှာ ကံတွင်း ကျေးရွာကို ပြန်လာခဲ့တာပါ။

အဲဒီနောက် ဧပြီ(၁၃)ရက်မှာ သူနဲ့အတူ အသက်(၁၀)နှစ် အရွယ် သမီးဖြစ်သူပါ လည်ပင်းနာပြီး ဖျားလာတာကြောင့် Hospital Quarantine လုပ်ပြီး လိုအပ်တဲ့စစ်ဆေးမှု တွေလုပ်ဖို့ မလှိုင်ဆေးရုံကိုခေါ်ထားခဲ့တာဖြစ်တယ်လို့လည်း ဒေါက်တာ နေမင်းမျိုးထွန်းကပြောပါတယ်။

အတည်ပြုလူနာ အမှတ်(၈)ဟာ ရန်ကုန်တိုင်းဒေသကြီး၊ ဗဟန်းမြို့နယ်က အသက်(၆၀)နှစ်အရွယ် ဧည့်လမ်းညွှန် အမျိုးသမီး တစ်ဦးဖြစ်ပြီး မတ်(၂၈)ရက်မှာ ကျန်းမာရေးဝန်ကြီးဌာနက COVID-19 ရောဂါပိုးတွေ့လူနာအဖြစ် အတည်ပြု ထုတ်ပြန်ထားခဲ့တာဖြစ်ပါတယ်။

သတင်း-ဘိုဘို(မလှိုင်)

Add a Comment

Your email address will not be published. Required fields are marked *